Son vaxtlar təcrübəsiz və idarəçilik qabiliyyəti olmayan müəllimlərin imtahan verib direktorluq qazanması, daha sonra isə məktəbdə direktor vəzifəsində çalışması hallarına rast gəlinir. Bu da öz növbəsində problem yaradır. Ona görə də imtahanlarda yalnız bilik yox, həmin şəxsin eyni zamanda idarəçilik qabiliyyəti və təcrübəsi nəzərə alınmalıdır. Direktor seçimində alnız bilik əsas meyar olmamalıdır. Elə bu səbəbdən də son günlərdə bəzi orta məktəblərdə yerində olmayan direktor təyinatları, yeni direktorların naşı, o qədər də yüksək iddialarla məktəblərə gəlişi müəllimlərin haqlı narazılıqları ilə qarşılanır. Sumqayıt şəhər 11 nömrəli məktəbdə də bu cür xoşagəlməz hallar baş verməkdədir. Qısa bir zamanda baş verənlər onu göstərir ki, yeni təyin olunan direktor Şəlalə Hüseynova böyük kontingentə malik məktəbi idarə etmək iqtidarında deyil. Təyin olunduğu gündən məktəbdə problemlərin ardı-arası kəsilmir. Rəqəmsal dərslərin keçirildiyi bir vaxtda günlərlə internet problemi yaşanıb. Məktəbin su motorunda yaranmış nasazlıq səbəbindən günlərlə məktəbdə su olmayıb. İdarəçiliyin zəifliyi şagirdlərin davamiyyətinə də mənfi təsir göstərib. Direktor şagirdlər və valideynlər arasında yaranmış münaqişələri həll etmək bacarığında deyil.

İş bununla yekunlaşmır. Valideynlərin redaksiyamıza verdiyi məlumata görə, xanim direktor Ş.Hüseynova şagirdlərdən kütləvi pul yığılmasını adi hala çevirib. Məktəb rəhbərliyinə gəldiyi qısa müddət ərzində 8 mart Beynəlxalq Qadınlar Günündə və özünün doğum günündə kütləvi pul yığan direktor indi də “Son zəng” əməliyyatına başlayıb. Valideynlərin bildirdiyinə görə, tərəfindən hər bir şagirddən müəyyən məbləğdə pul tələb olunub və bu, könüllü ianə deyil, məhz məcburi xarakter daşıyıb. Bəzi valideynlərin imkanlarının məhdud olmasına baxmayaraq, onlara övladlarının son zəng tədbirinə buraxılmayacağı ilə bağlı dolayı təzyiqlər göstərildiyi iddia olunur. Qanunvericiliyə əsasən, ümumtəhsil müəssisələrində valideynlərdən pul yığılması qadağandır. Təhsil Nazirliyi dəfələrlə bəyan edib ki, məktəblərdə hər hansı tədbir üçün pul toplamaq yolverilməzdir və bu hal aşkarlandıqda məsul şəxslər barəsində tədbirlər görülməlidir. Amma Şəlalə Hüseynova bunu vecə almazdan gəlir və hər kəsə açıq şəkildə Elm və Təhsil Nazirliyinin belə onun qarşısını ala bilməyəcəyini deyir.

Onu da qeyd edək ki, Şəlalə Hüseynovanın hansı yollarla Sumqayıtın ən böyük kontingentə sahib məktəbinə direktor göndərilməsi də şübhəli məsələdir. İddia edilir ki, Hüseynovanın atası general-leytenant Zahid Hüseynovun bu təyinatdakı rolu danılmazdır. Bəs, Zahid Hüseynov kimdir? Azərbaycan Respublikası Silahlı Qüvvələrinin Baş Qərargah rəisinin birinci müavini, general-leytenant Zahid Hüseynov Zəfər savaşından sonra Nəcməddin Sadıqova bağlı kadrlar silsiləsində vəzifəsindən azad edilib. Zahid Hüseynov polkovnik-leytenant rütbəsindən Silahlı Qüvvələrin Artilleriya Qoşunları komandanı və Baş Qərargah rəisinin birinci müavini təyin edilməsinə qədər bütün pillələrdə məhz Nəcməddin Sadıqovun himayəsi ilə yüksəlib. İndi bu şəxsin məhz rusdilli Azərbaycan məktəbinə direktor təyin olunması daha ciddi, təhlükəli məqamlardan xəbər verir.(Xalq.online)