Faktlar sadəcə sıradan bir prosedur pozuntusu deyil, birbaşa kütləvi və ağır cinayət qoxulu əməllərdir

QHT-lərə Dövlət Dəstəyi Agentliyi rəsmilərinin hər fürsətdə, keçirdikləri tədbirlərdə və media qarşısında dilə gətirdiyi “fəaliyyətimizdə şəffaflıq və hesabatlılıq prinsiplərini əsas tuturuq” bəyanatı, sən demə, ictimaiyyəti aldatmaq üçün istifadə olunan növbəti pafoslu söz yığınından başqa bir şey deyilmiş. Əvvəlki yazılarımızda konkret faktlarla bu qurumdakı qanunsuzluqları, tenderlərdəki şübhəli məqamları və maliyyə əməliyyatlarını ictimailəşdirsək də, aidiyyəti nəzarət orqanlarının dərin susqunluğu baş verənlərin arxasında nə qədər böyük maraqların dayandığını göstərməkdədir. Görünən odur ki, Agentlikdə tüğyan edən maliyyə əməliyyatları məlum səbəblərdən böyük bir ustalıqla, sistemli şəkildə ört-bastır edilir.

Lakin dünən sosial şəbəkədə rezonans doğuran bir paylaşım Agentlik rəsmilərinin uydurduğu şəffaflıq nağıllarını darmadağın edərək bütün maskaları növbəti dəfə cırdı. “Əsgər Ailələrinə Dəstək” İctimai Birliyinin sədri Mətanət Əsgərqızının ortaya qoyduğu kəskin və təkzibedilməz fakt dövlət satınalmalarındakı özbaşınalığın və maxinasiyaların hansı dəhşətli həddə çatdığını açıq-aşkar sübut edir.

Məsələnin ən biabırçı və absurd tərəfi odur ki, bu günlərdə Antiinhisar və İstehlak Bazarına Nəzarət Dövlət Agentliyi ilə QHT-lərə Dövlət Dəstəyi Agentliyi birgə satınalma sahəsində dövlət və vətəndaş cəmiyyəti əməkdaşlığına dair tədbir keçirib. Öz daxili fəaliyyətində kütləvi qanun pozuntularına, saxtakarlıqlara yol verən, maliyyə şəffaflığı bərbad vəziyyətdə olan bir qurumun başqaları ilə şəffaflıq müzakirəsi aparması, dürüstlükdən mühazirə oxuması absurdun son həddidir. Mətanət xanım da haqlı olaraq sual edir ki, daxilində bu qədər ciddi satınalma problemləri, korrupsiya şübhələri olan bir qurum kimi QHT-lərə Dövlət Dəstəyi Agentliyi ilə əməkdaşlıq hansı məntiqə sığır?

Ortadakı faktlar isə sadəcə sıradan bir prosedur pozuntusu deyil, birbaşa kütləvi və ağır cinayət qoxulu əməllərdir. QHT-lərə Dövlət Dəstəyi Agentliyinin Tender Komissiyasının keçmiş üzvü və Agentliyin sabiq əməkdaşı Rövşən Həmidlinin təzyiqlərə baxmayaraq imzalamaqdan imtina etdiyi qanunsuz tender protokollarına şəxsən Agentliyin İcraçı direktoru Aygün Əliyeva onun yerinə imza atıb. Başqasının əvəzinə saxta imza atılması kimi kəskin sənəd saxtakarlığı barədə Rövşən Həmidli tərəfindən Prezident Administrasiyası və İqtisadiyyat Nazirliyinə rəsmi müraciətlər edilsə də, bu dəhşətli faktın qarşısında hələ də sirli bir sükut hökm sürür. Ortada bu qədər ciddi müraciət, canlı şahid və təkzibolunmaz sübut olduğu halda, məsələnin araşdırılmaması, araşdırmaların qarşısının alınması bu qanunsuzluqların bilərəkdən ört-bastır edildiyini aydın şəkildə göstərir.

Üstəlik, bu, Agentlikdəki ilk korrupsiya sxemi və maliyyə maxinasiyası da deyil. Əvvəlki yazılarımızda da diqqətə çatdırdığımız “Heydər Əliyevin Şuşa sevgisi” adlı tədbir üzrə keçirilən tenderdə rəsmi sənəd üzərində dövlətin külli miqdarda vəsaiti mənimsənilib. Hətta hesabatlara saxtalaşdırılmış, montaj edilmiş tədbir şəkilləri əlavə edilsə də, reallıqda həmin tədbir ümumiyyətlə icra olunmayıb. Müqəddəs Şuşamızın və Ulu öndərin adından istifadə edərək keçirilməyən tədbirlərə pul silinməsi, sənədlərin saxtalaşdırılması faktı mediada dəfələrlə işıqlandırılsa da, nəzarət qurumları bu özbaşınalığı araşdırmaqda maraqlı görünmür, əksinə, cinayətin izlərini itirməyə, məsələni gündəmdən çıxarmağa çalışırlar.

Bütün bu faktlar təkzibedilməz şəkildə tək bir həqiqəti ortaya qoyur: QHT-lərə Dövlət Dəstəyi Agentliyində dəhşətli miqyasda korrupsiya, dövlət əmlakının mənimsənilməsi və sistemli sənəd saxtakarlığı var. Bu istiqamətdə "Yenixeberorg"a ötürülən məlumata görə, korrupsiya piramidasını idarə edənlər, Agentliyə nəzarət etməli olan cavabdeh şəxslər və aidiyyəti qurumlar bu cinayətlərə bilərəkdən göz yumurlar. Çünki burada qurulan çirkin maliyyə mexanizmindən hər kəs öz payını alır. Şəxsi maliyyə maraqları dövlət maraqlarını üstələdiyi üçün bu dəhşətli korrupsiya faktları ört-bastır edilir.

Unutmaq olmaz ki, Cənab Prezident İlham Əliyev hər zaman korrupsiyaya, məmur özbaşınalığına və dövlət əmlakının mənimsənilməsinə qarşı barışmaz mövqe tutub, bu sahədə ən sərt və qətiyyətli tədbirlər görüb. İnanırıq ki, QHT-lərə Dövlət Dəstəyi Agentliyində baş verən bu biabırçı qanunsuzluqlar, tender saxtakarlıqları və korrupsiya faktları barədə Cənab Prezidentə tezliklə tam və obyektiv şəkildə ciddi məruzə olunacaq. Əks halda, dövlət büdcəsinin talanması, sənədlərin saxtalaşdırılması və bu cür ağır cinayət hərəkətlərinin ört-bastır edilməsi bilavasitə Cənab Prezidentin yürütdüyü dövlət siyasətinə və şəxsən Cənab Prezidentə qarşı açıq-aşkar xəyanətdir!(Yenixeberorg.com)

Qarşı tərəfin cavab haqqını tanıyırıq.