İş adamı Prezidentdən kömək istədi: “Məni 50 min manat ziyana salıblar”

Türkiyəli iş adamı, “Sweet Fresh Tarım Ürünləri Sanayi ve Ticaret Limited” şirkətinin rəhbəri Ceyhun Mahmudzadə 1xeber.media-ya müraciət edərək üzləşdiyi problemin ictimailəşdirilməsini və ona kömək göstərilməsini xahiş edib.

İş adamının sözlərinə görə, o, Türkiyənin Mersin şəhərində uzun illərdir meyvə-tərəvəz sahəsində fəaliyyət göstərir və yetişdirdiyi məhsulları əsasən xarici bazarlara ixrac edir.

Ceyhun Mahmudzadə bildirib ki, bu il mayın 16-da Rusiya Federasiyasına sifariş əsasında meyvə göndərmək istəyərkən ciddi problemlə üzləşib.

“Mayın 16-da Rusiyaya məhsul göndərmək üçün TIR sifariş verdim. Maşının Azərbaycan nəqliyyat şirkətinə məxsus olduğunu görəndə sevindim və mallarımı “Bakı Səyahət” MMC şirkətinin İlkin adlı sürücüsünə təhvil verdim.

Sürücü Gürcüstan ərazisinə keçdikdən sonra maşını saxlayaraq özü kazinoya gedib. Hətta məndən beh kimi aldığı 1500 dolları da özü ilə aparıb. İki gün maşının yerindən tərpənmədiyini görəndən sonra sürücünü axtarmağa başladım. Tapmadığım üçün daşıyıcı şirkət olan “Bakı Səyahət” MMC-nin rəhbərliyindəki İbad adlı şəxslə əlaqə saxladım”, – deyə o bildirib.

Şikayətçinin sözlərinə görə, birgə axtarışlardan sonra yükün Rusiyaya çatdırılması üçün başqa sürücü tapılıb. Lakin məhsul birinci sürücünün adına rəsmiləşdirildiyi üçün gömrükdə problemlər yaranıb və nəticədə yük yalnız 19 gündən sonra Rusiyanın Krasnodar şəhərinə çatdırılıb.

Onun iddiasına əsasən, məhsul təyinat yerinə çatanda yükün 70-80 faizinin yararsız vəziyyətə düşdüyü müəyyən edilib.

Ceyhun Mahmudzadə baş verənlərə görə daşıyıcı şirkətin məsuliyyət daşıdığını bildirərək, şirkətlə danışıqlar aparmağa çalışdıqlarını qeyd edib.

“Daşıyıcı şirkətə dedik ki, belə hallarda dəymiş ziyanı daşıyıcı ödəməlidir. Gəlin danışaq və ziyanın qarşılanması ilə bağlı razılığa gələk. Bunun üçün əməkdaşlarımız Bakıya gəldi. Burada onları özünü “Bakı Səyahət” MMC-nin sahibi kimi təqdim edən Qaxın keçmiş polis rəisi Vidadi Qurbanov qarşılayıb. Uzun müzakirələrdən sonra o, dəymiş ziyanın cəmi 5 min manatını ödəyə biləcəyini dedi. Eyni zamanda əməkdaşlarımıza hədə-qorxu gələrək ‘ağıllı olmalarını’ tövsiyə etdi”, – deyə iş adamı iddia edib.

Şikayətçi bildirib ki, baş verən hadisə nəticəsində ona ümumilikdə 50 min manat məbləğində ziyan dəyib.

Bu səbəbdən Ceyhun Mahmudzadə Azərbaycan Prezidenti İlham Əliyevə müraciət edərək məsələnin araşdırılması və dəymiş ziyanın ödənilməsi üçün kömək göstərilməsini xahiş edib.

“Cənab Prezident, bizə dəymiş ziyanın ümumi məbləği 50 min manatdır. Sizdən xahiş edirəm ki, ziyanın ödənilməsi üçün aidiyyəti qurumlara müvafiq göstəriş verəsiniz. Prezidentə müraciətimin cavabsız qalmayacağına inanıram. Ümidim Azərbaycan Prezidenti cənab İlham Əliyevədir”, – deyə müraciətdə bildirilir.

Qeyd: Yazıda yer alan məlumatlar və iddialar müraciət edən şəxsin mövqeyini əks etdirir. Qarşı tərəfin mövqeyini dərc etməyə hazırıq.

<iframe width="640" height="360" src="https://www.youtube.com/embed/vywrR0mZMH4" title="Türkiyəli iş adamından sensasion iddia: &quot;Məni 50 min manat ziyana salıblar&quot;" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>