Abşeron rayonu ərazisində, xüsusilə Xırdalan şəhərində qanunsuz olduğu iddia edilən tikinti işlərinin sayının artdığı bildirilir.

 XALQ  bildirir ki, sosial şəbəkələrdə yayılan məlumatlara baxmayaraq, məsələ ilə bağlı rəsmi qurumlar tərəfindən hələlik hər hansı açıqlama verilməyib.

Daxil olan növbəti məlumata görə, Xırdalan şəhəri, Heydər Əliyev prospektində yerləşən hündürmərtəbəli yaşayış binasında əlavə mansar mərtəbəsinin inşa edildiyi iddia olunur.

Bildirilir ki, sözügedən bina İlham adlı iş adamına məxsusdur və həyata keçirilən tikinti işləri üçün rəsmi icazə sənədləri mövcud deyil.

İddialarla bağlı rayon icra hakimiyyətinə ünvanlanan sorğular cavabsız qalıb. Eyni zamanda, Azərbaycan Respublikasının Dövlət Şəhərsalma və Arxitektura Komitəsi tərəfindən də məsələ ilə bağlı hələlik hər hansı rəsmi mövqe açıqlanmayıb.

Qeyd edək ki, son dövrlər Abşeron rayonu ərazisində, xüsusilə Xırdalanda çoxmərtəbəli yaşayış binalarında əlavə mərtəbələrin tikilməsi və layihədənkənar dəyişikliklərlə bağlı iddialar intensivləşib. Mütəxəssislər bu cür halların həm şəhərsalma normalarının pozulmasına, həm də təhlükəsizlik risklərinə səbəb ola biləcəyini vurğulayırlar.(Xalq.online)

Məsələ ilə bağlı qarşı tərəfin mövqeyini dərc etməyə hazırıq.